وڭتۇستىك  قازاقستان وبلىسىنا كەلگەن قوناقتار ەندى ايماقتاعى تاريحي-مادەني ەسكەرتكىشتەر مەن تابيعي لاندشافتارى جايلى اقپاراتتى عالامتوردان ەش قيىندىقسىز تابا الادى. سەبەبى، وبلىسقا ساياحاتتاپ كەلگەن تۋريستەردى اقپاراتپەن قامتاماسىز ەتۋ ماقساتىندا  وڭىردەگى 22 نىسانعا QR-كود  تاقتايشالارى ورناتىلدى.

QR-كود  تاقتايشالارى ورناتىلعان كيەلى، تاريحي نىسانداردىڭ تىزىمىنە اقبۋرا كەسەنەسى،  «سايرام-وگەم» ۇلتتىق تابيعي پاركى، وتىرار جانە ساۋران قالاشىقتارى، «قاراتاۋ» مەملەكەتتىك تابيعي قورىعى، اق مەشىت اۋليە ۇڭگىرى، اقسۋ-جاباعىلى قورىعى، يسمايل اتا كەسەنەسى، «كەمە قالعان» مونۋمەنتى، ارىستان باب جانە بابا تۇكتى شاشتى ءازىز، بايدىبەك اتا جانە دومالاق انا، گاۋحار انا مەن يبراگيم اتا، قارابۋرا كەسەنەلەرى، «قىزىر پايعامبار» مۇناراسى، قاراشاش انا مەن قوجا احمەت ياسساۋي، ۇكاش اتا مەن اپپاق يشان، ىسقاق باب كەسەنەلەرى ەنگەن.

"Ontustik Tourism Center" تۋريستىك اقپاراتتىق ورتالىعى  كيەلى جەرلەر  تۋرالى اقپاراتتى ءۇش تىلدە ازىرلەگەن. مامانداردىڭ سوزىنشە، كودتى سۋرەتكە تۇسىرگەندە مالىمەت سمارتفوننان وقىلادى.  ال ونى وقۋ ءۇشىن سمارتفونعا ينتەرنەتتەن «Neo Reader» جانە «QR Reading» سياقتى باعدارلامالاردى كوشىرىپ السا جەتكىلىكتى. ورناتىلعان تاقتايشالار كەلۋشى تۋريستەر مەن جەرگىلىكتى تۇرعىنداردىڭ كوڭىلىنەن شىعۋدا. ولاردىڭ پىكىرىنشە، باعدارلاما كەز كەلگەن تۋريستكە ولكە جايلى باسقا دا قىزىقتى ماعلۇماتتاردى ىزدەۋگە مۇمكىندىك بەرەدى.سونىمەن  قاتار، تاقتايشالاردا كورسەتىلگەن ON Guide ءموبيلدى قوسىمشاسىنان وبلىستىڭ تۋريستىك نىساندارى تۋرالى اقپارات الۋعا بولادى.

ماسەلەن، تۇركىستان قالاسىنداعى  تاريحي جانە مادەني نىسانداردىڭ تۋريستەرىنە ارنالعان شتريح-كودتارى ءقازىردىڭ وزىندە كوپشىلىكتىڭ جوعارى باعاسىن الىپ ۇلگەردى. ال، «حازرەت سۇلتان» مەملەكەتتىك تاريحي-مادەني مۇراجاي-قورىعىنىڭ ەسكەرتكىشتەرىن 3D تۇرىندە ۆيرتۋالدى ساياحات ارقىلى كورۋگە بولادى. بۇل دەگەنىمىز، الەمنىڭ كەز كەلگەن جەرىنەن ادام مۇراجاي ەكسپوناتتارىن كورەدى جانە ينتەرنەتتە ولار تۋرالى تولىق اقپارات الا الادى. «قوجا احمەت ياسساۋي» مۇراجاي-قورىعىندا جەرلەنگەن حاندار، سۇلتاندار، باتىرلار مەن بيلەردىڭ ءتىزىمى ەلەكتروندى تۇردە جاسالدى. بۇگىنگى كۇنى مۇراجايدىڭ كەستەسى مەن وقيعالار تۋرالى اقپارات عيماراتتىڭ قاسبەتىندە، «Led» ەكرانىندا ورنالاستىرىلعان.

الداعى ۋاقىتتا «وقو كيەلى ورىندارى (ەسكەرتكىشتەرى) گەواقپاراتتىق جۇيەدە» جانە «وڭتۇستىك قازاقستاننىڭ كيەلى جەرلەرى گەوگرافياسى» اتتى  700-گە جۋىق كيەلى نىساندارعا، سونداي-اق  اۋدان، قالالاردا ورنالاسقان 100 مونۋمەنتتى ونەر تۋىندىسىنا QR-كود باعدارلاماسى ەنگىزىلەتىن بولادى.

ال، قازاقستاننىڭ كيەلى جەرلەرى كارتاسىنا ەنگەن 24 نىساندى جانە وبلىستاعى  مۋزەيلەردىڭ قورىن سيفرلاندىرىپ، «Ontustik TourAudio» ءموبيلدى قوسىمشاسىن ازىرلەۋدە. ءموبيلدى قوسىمشا دىبىستىق اقپاراتپەن قوسا، ماتىنمەن سينحروندالعان گرافيكالىق بەينەلەرمەن قاتار جۇرۋگە مۇمكىندىك بەرەدى.

ايتا كەتەيىك،  وبلىستاعى 104 كيەلى جەرلەردىڭ ءتىزىمى «قاسيەتتى قازاقستان» عىلىمي-زەرتتەۋ ورتالىعىنا ۇسىنىلىپ، 24 نىسان وڭتۇستىك قازاقستان وبلىسىنان رەسپۋبليكالىق تىزىمگە ەنگىزىلدى. قالعان 80 تاريحي-مادەني ەسكەرتكىشتەر جەرگىلىكتى ماڭىزى بار قاسيەتتى، كيەلى جەرلەردىڭ قاتارىنان تابىلدى.  جالپى،  كيەلى ورىنداردى دامىتۋ ماقساتىندا 2017 جىلى جەرگىلىكتى بيۋدجەتتەن 314،6 ملن تەڭگە قارجى قارالىپ، تولىعىمەن يگەرىلدى.